Kosova U19 gati për sfidat e kualifikimeve në Evropianin e Uellsit
Përzgjedhësi i Kombëtares U19 të Kosovës, Albert Bunjaku, ka publikuar listën e futbollistëve të ftuar për raundin e parë kualifikues të Kampionatit Evropian U19, që do të zhvillohet në Uells.
Dardanët e rinj janë pjesë e Grupit 12, ku do të përballen me tri kundërshtare të forta: Gjermaninë, Norvegjinë dhe Armeninë. Ky raund pritet të jetë një test i rëndësishëm për gjeneratën e re të futbollistëve kosovarë, të cilët synojnë ta përfaqësojnë vendin me dinjitet në arenën ndërkombëtare.
Programi i ndeshjeve të Kosovës U19:
🇳🇴 Norvegji U19 – Kosovë U19, 8 tetor, ora 15:00
🇩🇪 Gjermani U19 – Kosovë U19, 11 tetor, ora 19:00
🇽🇰 Kosovë U19 – Armeni U19, 14 tetor, ora 17:00
Skuadra e Bunjakut do të kërkojë rezultate pozitive për të mbajtur gjallë shpresat për një sukses historik në garat e UEFA-s për grupmoshat U19.
Kosova U19 tashmë ka treguar progres të dukshëm në vitet e fundit dhe ky edicion mund të jetë një tjetër hap drejt konsolidimit të brezit të ri të talenteve në futbollin kosovar.
